"A SOLVENCIA DAS CONTAS PÚBLICAS GALEGAS PERMITIRÁ ESTABLECER A INFANCIA COMO OBXECTIVO PRIORITARIO DA XUNTA" (Feijóo)

RIAS BAIXAS TRIBUNA / Redacción)

O titular da Xunta visitou esta mañá as instalacións da escola infantil A Galiña Azul de Fene-A Torre e a nova escola infantil de Fene-Barallobre

FEIJÓO SALIENTA QUE A SOLVENCIA DAS CONTAS PÚBLICAS GALEGAS PERMITIRÁ ESTABLECER A INFANCIA COMO OBXECTIVO PRIORITARIO DA XUNTA, DAS SÚAS POLÍTICAS SOCIAIS E DO SEU ORZAMENTO PARA 2016 

Destaca a creación para o vindeiro curso de preto de 2.000 prazas públicas en escolas infantís de 0 a 3 anos, cun investimento total de 66 millóns de euros; o que supón un 9% máis de prazas públicas que en 2015
Avanza que xunto coa nova escola infantil de Fene-Barallobre se abrirán outras seis 
en setembro: Marín-Seixo, Oza-Cesuras, Tomiño, Ames-Bertamiráns, A Coruña-Fao e Burela; que ofrecerán un total de preto de 400 novas prazas
Resalta tamén a posta en marcha para o vindeiro curso de 7 escolas infantís situadas en diferentes polígonos industriais
Di que coa creación de 2.000 novas prazas, Galicia se converterá nunha das rexións da UE cunha ratio de prazas por riba dos obxectivos da UE, “xa que se o obxectivo da Unión é de 33 prazas por cada 100 –precisa-, nós chegaremos a unha ratio superior ao 37%”
Refírese tamén a outras iniciativas financiadas pola Xunta como as casas-niño, que seguirán espallando o sistema ao rural grazas a 150 novas prazas, ou o servizo de atención no fogar a través do Bono Coidado
Destaca a posta en marcha do Bono Concilia, un programa de axudas económicas directas ás familias para colaborar no pago dunha praza de escola infantil naqueles casos en que non a consigan nunha escola ou nun centro financiado con fondos públicos, ou que residan nunha localidade na que non existen prazas públicas
Conscientes de que o principal problema de Galicia é a demografía, o Programa de apoio á natalidade pretende obxectivar todas e cada unha das iniciativas que a Xunta quere levar a cabo no ámbito da infancia

O presidente do Goberno galego, Alberto Núñez Feijóo, destacou hoxe que a solvencia das contas públicas galegas permitirá establecer a infancia como obxectivo prioritario da Xunta, das súas políticas sociais e, en consecuencia, do seu orzamento para 2016. Nesta liña, avanzou a creación para o vindeiro curso de preto de 2.000 prazas públicas en escolas infantís de 0 a 3 anos, cun investimento total de 66 millóns de euros; o que supón un 9% máis de prazas públicas que en 2015.

Durante unha visita esta mañá ás instalacións da escola infantil A Galiña Azul de Fene-A Torre e á nova escola infantil de Fene-Barallobre, Feijóo precisou que 41 desas prazas estarán en Fene, “nesta gardería de Barallobre e que se sumarán ás 61 que xa xestionamos na Torre”, dixo, logo de subliñar que este municipio superará cunha ratio de máis do 40% as esixencias da Unión Europea.

Así mesmo, o responsable do Goberno galego avanzou que xunto con esta escola infantil tamén se abrirán outras seis en setembro: Marín-Seixo, Oza-Cesuras, Tomiño, Ames-Bertamiráns, A Coruña-Fao e Burela. E que ofrecerán un total de preto de 400 novas prazas.

Despois de subliñar que no vindeiro curso, coa creación destas 2.000 novas prazas, Galicia se converterá nunha das rexións da UE que goce dunha ratio de prazas por riba dos obxectivos da Unión Europea, “xa que se o obxectivo da UE é de 33 prazas por cada 100, nós chegaremos a unha ratio superior ao 37%”. Feijóo afirmou que neste obxectivo colaboran tamén os 166 centros dependentes da Xunta “nos que ofrecemos 9.700 prazas”, os 119 centros dos concellos “que contribuímos a financiar”, as 424 prazas subvencionadas nas garderías concertadas, e as escolas infantís  que xestiona a iniciativa social.

Nesta liña, destacou tamén a posta en marcha para o vindeiro curso de 7 escolas infantís situadas en diferentes polígonos industriais. E referiuse tamén a outras iniciativas financiadas pola Xunta como as casas-niño, que seguirán espallando o sistema ao rural grazas a 150 novas prazas; o servizo de atención no fogar -a través do Bono Coidado-; e a posta en marcha do Bono Concilia, un programa de axudas económicas directas ás familias para colaborar no pago dunha praza de escola infantil naqueles casos en que non a consigan nunha escola ou nun centro financiado con fondos públicos, ou que residan nunha localidade na que non existen prazas públicas.


Todas estas iniciativas permitirán, segundo explicou o titular da Xunta, dar un paso máis na resolución dun dos maiores retos: a conciliación da vida familiar e laboral. Non en van, e conscientes de que o principal problema de Galicia é a demografía, o Programa de apoio á natalidade pretende obxectivar todas e cada unha das iniciativas que a Xunta quere levar a cabo no ámbito da infancia.