A MOSTRA ‘OS SENTIDOS DA CAMELIA’ RECIBIU MÁIS DE 7.000 VISITAS DURANTE A FIN DE SEMANA

 Eva Vilaverde destacou que na exposición se demostrou “o interese do público en mercar produtos elaborados coa camelia que se poden producir na nosa terra” 

 “Sería un éxito absoluto que o campo galego se dese conta de que en Galiza temos as mellores condicións para desenvolver todas as potencialidades da planta”, dixo  

O LI Concurso Exposición Internacional da Camelia, que nesta edición levou o nome de ‘Os sentidos da camelia’, recibiu durante a fin de semana máis de 7.000 visitas. A mostra, organizada pola Deputación de Pontevedra e instalada no Recinto Feiral de Pontevedra, estivo aberta o sábado pola tarde e o domingo durante todo o día, sendo preciso nalgúns momentos pechar o acceso debido á gran cantidade de público que había no interior. A deputada delegada da Estación Fitopatolóxica de Areeiro, Eva Vilaverde, sinalou o grande éxito de público, máis tamén salientou que a celebración da exposición tamén pagou a pena polo interese dos visitantes nos produtos elaborados con camelia. 
“ Máis aló da enorme afluencia de público sei que esta fin de semana houbo xente que saíu da mostra preguntando onde mercar cremas, aceites, marmeladas, plantas de camelia… e incluso querendo ir aos restaurantes a probar sobremesas elaboradas con camelia. Só por iso, o traballo xa pagou a pena”, sinalou Vilaverde, que insistiu en que “se aínda por enriba a alguén lle empeza a roldar pola cabeza que todos eses produtos os podemos facer aquí en Galiza e que temos as mellores condicións, iso xa é un éxito absoluto”. 
Vilaverde lembrou que a intención da Deputación de Pontevedra coa exposición deste ano era dar a coñecer todas as potencialidades económicas da camelia, non só centrándose na beleza da flor e a súa capacidade de atracción turística, senón tamén na súa viabilidade como cultivo para a comercialización de té ou de aceite. “Non se poden desaproveitar a riqueza que pode darnos, xa que as Rías Baixas é un dos lugares do mundo onde mellor se produce”, dixo. 
A mostra de ‘Os sentidos da camelia’ estaba dividida en cinco espazos. O primeiro era o da vista, onde se podían admirar cultivares de 54 expositores de toda Galicia; despois estaba o espazo do oído, onde se celebraron contacontos que reuniron a decenas de cativos que interactuaron cos membros de ‘Polo correo do vento’ coa historia ‘A fada das camelias’. No espazo do tacto permitiuse aos visitantes tocar a planta e todo o derivado da camelia, tanto as follas como os pétalos, madeira, sementes, e tamén os tés e o aceite de camelia, co que os visitantes refregaron as mans comprobando as súas propiedades hidratantes e incluso biobactericidas dentro do mundo da cosmética. No espazo do olfato, o público puido ulir fragancias, cremas, aceites, tés e tamén as camelias olorosas, ata fai pouco descoñecidas en Galiza.
O espazo do gusto foi o que despuntou como novidade dentro da mostra e os momentos de cociña en directo de Iñaki Bretal e de representantes do Centro de Hostelería Carlos Oroza  supuxeron tamén un éxito rotundo. Centenares de persoas se agolparon ante a cociña no momento das exhibicións e incluso entre bambalinas mentres se facían os traballos previos aos ‘showcooking’. A degustación dos dous pratos elaborados foi recibida con moi boa acollida por parte do público, que se convenceu de que a camelia pode ser un ingrediente de calquera prato elaborado na casa. 

O feito de que a mostra coincidise cos primeiros días da Semana Santa, por outra banda, fixo que a mostra se convertese nun evento internacional, xa que houbo moito público estranxeiro que aproveitou a estancia ou paso pola cidade para achegarse ao Recinto Feiral. Foi habitual ver aos expositores explicando aos visitantes as características das súas flores tanto en inglés, como francés e sobre todo portugués.